Cantus Firmus Surselva - Home








romontsch | deutsch | kontakt






Dirigent
Dirigent
Clau Scherrer

Clau Scherrer


Clau Scherrer ei naschius a Trun ils 31 d’uost 1976. Alla Scola da musica Surselva survegn el sia emprema scolaziun al clavazin dad Arrmin Caduff. El accumpogna sias “Soras Scherrer” al clavazin en numerus concerts en l’entira Svizra. Era autras formaziuns pladeschan el pil survetsch al clavazin. Cun dudisch onns surpren el il post d’organist a Schlans. Dils 1992 entochen 1997 frequenta el il Gimnasi da musica da Vorarlberg a sogn Pieder (Feldkirch) e vegn instruius al clavazin da prof. Ferenc Bognar che daventa per el il muossavia musical.

Gia sco giuven pianist retscheiva el differents premis: Il premi da promoziun dil cantun Grischun 1989 (fargliuns Scherrer); emprem premi Lions per giuvens musicists dalla Scola da musica Surselva; premi dalla CRR 1992; differentas distincziuns sco partenari al clavazin a caschun dall’occurrenza naziunala dall’Austria “Prima la musica”; emprem premi dalla concurrenza “Bösendorfer”; 2. premi dalla concurrenza da solists “Prima la musica” dall’Austria. Igl onn1992 survegnan ils fargliuns Scherrer il premi da cultura dalla vischnaunca da Trun. Dapi 1998 surpren Clau Scherrer regularmein la correpetiziun al Teater da Vorarlberg a Bregenz. El frequenta cuors da meister tier Ferenc Rados. Igl onn 1999 fa el il diplom da concert cul pli ault predicat e serenda all’Academia da musica a Basilea tier prof. Jürg Wyttenbach e terminescha quei studi la primavera 2002 cun l’aulta distincziun. Igl onn 2004 terminescha el siu studi sco dirigent da chor all’Academia da musica a Basilea. El instruescha clavazin alla Scola da musica Surselva ed alla scola da musica Domat/Ems Felsberg ed ei commember digl Ensemble Plus a Bregenz, cul qual el ha produciu differents discs cumpacts.

Las activitads dil giuven musicist els secturs concert e musica da combra ein fetg numerusas. Era registraziuns per radio e disc cumpact, per semeglia “Rhapsody in blue” da Gershwin, “Karneval der Tiere” da Camille Saint-Saens ed il 2. Concert per clavazin da Gion Antoni Derungs (premaudiziun). Sco dirigent e pianist eis el staus engaschaus tier Südwestdeutsche Philharmonie Constanza, tier Landessymphonieorchester Bregenz, tier Barockorchester Capriccio Basel, tier Kammerphielharmonie Graubünden, tier Collegium Musicum St. Gallen, tier Staatsphilharmonie Oradea e.a.v. A caschun digl 1. MENHIR festival da musica 2004 ha Scherrer dirigiu pliras ovras. Il schaner 2005 funcziunescha el a Bregenz sco assistent tier producziuns dad operas. 2006, igl onn da Robert Schumann, vegn siu chor “Cantus Firmus” a cooperar el rom dil Bodenseefestival cun “Der Rose Pilgerfahrt”.

Igl onn1999 fundescha Clau Scherrer il chor “Cantus Firmus” che serecrutescha da cantaduras e cantadurs dalla Surselva. La musica da combra, la correpetiziun al teater da Bregenz e las experientschas cun auters chors sveglian en el plascher e talien per la musica vocala. Cantaduras e cantadurs dalla Surselva dattan d’entellir ad el lur giavisch da collaborar. Dapi il november 2004 diregia el il valent Chor viril Lumnezia.
La fin da december 2004 astga Clau Scherrer prender encunter il premi “Eljette von Karajan” sco renconuschientscha per sia lavur prestada. Quella renconuschientscha ei era da capir sco stimulaziun pil futur.