il chor 

Dirigent

Clau Scherrer

Clau ScherrerClau Scherrer ei naschius 1976 a Trun. Alla Scola da musica Surselva survegn el sia emprema scolaziun al clavazin dad Armin Caduff. El accumpogna sias “Soras Scherrer” al clavazin en numerus concerts en l’entira Svizra. Dils 1992 entochen 1997 frequenta el il Gimnasi da musica da Vorarlberg a sogn Pieder (Feldkirch) e vegn instruius al clavazin da prof. Ferenc Bognar che daventa per el il muossavia musical.
Gia sco giuven pianist retscheiva el differents premis: Il premi da promoziun dil cantun Grischun 1989 (fargliuns Scherrer); emprem premi Lions per giuvens musicists dalla Scola da musica Surselva; premi dalla CRR 1992; differentas distincziuns sco partenari al clavazin cun caschun dall’occurrenza naziunala dall’Austria “Prima la musica”; emprem premi dalla concurrenza “Bösendorfer”; 2. premi dalla concurrenza da solists “Prima la musica dall’Austria. Igl onn1992 survegnan ils fargliuns Scherrer il premi da cultura dalla vischnaunca da Trun. Dils 1998 entochen 2005 surpren Clau Scherrer regularmein la correpetiziun al Teater da Vorarlberg a Bregenz. El frequenta cuors da meister tier Ferenc Rados. Igl onn 1999 fa el il diplom da concert cun distincziun e serenda all’Academia da musica a Basilea tier prof. Jürg Wyttenbach e terminescha quei studi la primavera 2002 cun distincziun. Igl onn 2004 terminescha el siu studi sco dirigent da chor all’Academia da musica a Basilea. El instruescha clavazin alla Scola da Musica da Domat/Ems Felsberg ed alla Scola da Musica da Cuera. El ei staus commember digl Ensemble Plus a Bregenz, cul qual el ha produciu differents discs cumpacts. 2009 retscheiva el il premi CRR.

Las activitads dil giuven musicist els secturs concert e musica da combra ein fetg numerusas. Era registraziuns per radio e disc cumpact, per semeglia “Rhapsody in blue” da Gershwin, “Karneval der Tiere” da Camille Saint-Saens ed il 2. Concert per clavazin da Gion Antoni Derungs (premaudiziun).


Sco dirigent e pianist eis el staus engaschaus tier Südwestdeutsche Philharmonie Constanza, tier Landessymphonieorchester Bregenz, tier Barockorchester Capriccio Basel, tier Kammerphielharmonie Graubünden, tier Collegium Musicum St. Gallen, tier Staatsphilharmonie Oradea, Concerto Stella Matutina e.a.

Igl onn1999 fundescha Clau Scherrer il chor “cantus firmus surselva” che serecrutescha da cantaduras e cantadurs dalla Surselva.. Dapi il november 2004 diregia el il valent Chor viril Lumnezia. La fin da december 2004 astga Clau Scherrer prender encunter il premi “Eljette von Karajan” sco renconuschientscha per sia lavur prestada. Dapi ils 2005 ei el menader musical tier il festival ORIGEN, nua ch’el diregia mintga onn ina premaudiziun e plirs concerts. Naven digl atun 2010 vegn el a surprender il post da capellmeister dalla claustra da Mustér. Dils 2008-2010 diregia el era il Chor Svizzer da Giuvenils.