il chor 

Scolaziun dalla vusch

Scolaziun dalla vusch cun Rilana Cadruvi

Rilana Cadruvi ei naschida ils 9 da mars 1978 a Schluein. Leu ha ella passentau sia affonza ensemen cun duas soras e frequentau las scolas dil vitg. Cun sis onns survegn ella instrucziun da cant e clavazin dad Armin Caduff ella Scola da musica Surselva. Siu magister promova ella e dat caschun ad ella da sepresentar gia baul sco solista en l’entira Svizra ed egl exteriur.
Rilana Cadruvi frequenta il Seminari scolastic a Cuera e terminescha quel igl onn 1999. Parallel cun quella formaziun studegia ella cant a Turitg tier dunna Hellen Keller ed a Berna tier dunna Maria Riccarda Schmid- Wesseling. Ella profundescha sias enconuschientschas cun caschun da plirs cuors tier Hans Peter Blochwitz.
Igl october 2000 serenda ella a Basilea ell’Academia da musica e studegia tier Kurt Widmer. La primavera 2004 fa ella siu diplom d’instrucziun e serenda quei atun a Berna per studegiar ella classa da concert tier dunna Elisabeth Glauser.

Igl avrel 2002 survegn Rilana Cadruvi il premi dalla Fundaziun Friedl Wald Basilea e la stad 2003 il premi Jeunesse dil Fond Eliette von Karajan dil Grischun.
Siu repertori cumpeglia oratoris, messas e canzuns. Ses concerts ein numerus. Rilana Cadruvi sepresenta en Svizra, ell’Austria ed en Tiaratudestga. Ella ha cooperau a Vienna e Salzburg cun caschun dil festival “Toujours Mozart” e cul Barockorchester Capricio Basilea, cul Collegium Musicum Lucerna.
Sias activitads sco cantadura ein documentadas cun pliras registraziun per radio e disc cumpact.